Presidenti i Shteteve të Bashkuara të Amerikës, Donald Trump ka dhënë intervistën e parë në media për ABC News.
Në këtë intervistë Trump ka theksuar ndër të tjera se mbështet torturat e terroristëve në funksion të grumbullimit të informacioneve të vlefshme.
Presidenti është shprehur se kjo është një metodë plotësisht efektive, mendim të cilin ja kanë mbështetur edhe zyrtarë të mbrojtjes dhe inteligjencës.
“Kur ata po qëllojnë, kur po presin kokat e njerëzve tanë. Kur ata presin kokat e personave të ndryshëm vetëm për faktin se ndodh që në Lindjen e Mesme të ketë edhe të krishterë, kur ISIS po bën gjëra për të cilat askush nuk kishte dëgjuar që nga epoka mesjetare, a nuk më bën kjo që të mbështes aplikimin e torturave ndaj tyre? Mund të them se duhet t’a luftojmë zjarrin me zjarr.”- është shprehur kreu i Washington-it.
Kjo deklaratë siç pritej ka marrë kritika të ashpra kryesisht nga grupet e mbrojtjes së të drejtave të njeriut, të cilët kundërshtojnë të jetë kjo forma e duhur për luftimin e terrorizmit.
Nga Shtëpia e Bardhë Trump ka sqaruar sërish synimet edhe për ndërtimin e murit në kufirin me Meksikën. Ai është shprehur se “struktura do të nisë të ndërtohet brenda disa muajve dhe se qeveria meksikane, në një formë apo në një tjetër, do t’a rimbursojë administratën amerikane.”
