Në një takim me fermerët në Elbasan, kryeministri Edi Rama ka folur ndër të tjera për ankesat e qytetarëve për rritjen e çmimeve dhe protesta e pedagogëve që kanë bojkotuar mësimin prej pesë ditësh në tentativë për plotësimin e kërkesave nga qeveria.
Rama gjithashtu komentoi edhe nismën e Ministrisë së Bujqësisë për Akademinë e Barinjve duke i fyer si “injorantë” të gjitha ata që sipas tij nuk kanë lidhjen me fjalën akademi.
“Më thonë i ke çu çmimet o Edo? Çfarë kam çuar? Po japim mbështetje, po rrisim kapacitetet, po rrisim fuqinë duke bërë investime, ato nuk do jenë thjesht rrugë, po do bëjmë investime më të thella. Do bëjmë pikë frigoriferike, si do e bëjmë, do fusni kaq ju e kaq ne. Në TV, nuk kupton fare se çfarë ndodh realisht, si puna e protestës së pedagogëve, 90% janë në mësim, ato të rrugëve i kapin e i nxjerrin. Se kush ua bën ushqimet këtyre që kanë televizora nuk kuptohet, nxjerrin në ekran një grup që hedh qepët, mollët në rrugë, o s’kemi ku e shesim, nuk ka shtet. Pse nga njëri krah i qarkut mollët i hedhin në rrugë e në krahun tjetër i shesin me çmime maksimale. Ky dhe këta që i shesin me çmime maksimale janë të informuar. Duhet të shkojmë më tutje, të futemi më thellë në tregjet e reja, të gjitha janë të mundshme, i kemi ne në dorë nuk i ka lufta. Çfarë e ka lufta dhe Putin nuk e kemi ne në dore. Ky 1-shi nesër sa të më përcjellë mua sonte, të vijë në mëngjes te ju dhe t’ju thotë si do e bëjmë këtë punë? Brenda javësh të vijë në Tironë dhe të thotë ja ku është, nëse ndodh kështu, në fund të vitit tjetër jemi këtu për të inauguruar pikën frigoriferike. Ata që na ndjekin thonë se çfarë po na thotë kjo e barinjve. Janë ca injorantë që nuk kanë lidhje fare me fjalën akademi, por shumë shpejt do t’i ftojmë të vijnë, jo shumë larg nga këtu është një pikë fantastike nga 1-shi i Cërrikut, ai është 1-sh 1sh, ky është 1-sh në zgjatje”, tha Rama.
