Përbërësit
- Dy-tre kokrra të mëdha qepësh
- 4-5 thelpinj hudhre
- 3-4 domate të pjekura mirë
- 4 patlixhana të mëdhenj të zi
- Për ata që janë jo vegjetarian:
- 500g mish të prerë në kubikë të vegjël
- Vaj ulliri
- Kripë
- Pipër i zi
- Majdanoz
Përgatitja
Ndajini patlixhanët në gjysmë dhe me një lugë të vogël, hiqini tulin. Këtë të fundit, priteni ne copa të vogla dhe lëreni mënjanë për më vonë. Sipas dëshirës, mund t’u jepni patlixhanëve një të skuqur të lehtë.
Në një tenxhere të madhe hidhni me bollek vaj ulliri, dhe kur ky të jetë nxehur, hidhni për t’u kaurdisur qepët e grira hollë dhe hudhrat. Kur qepa të këtë marrë një ngjyrë të lehtë të artë, shtoni copat e mishit. Kaurdisini mirë derisa uji që lëshon mishi të jetë avulluar.
Ata që jnë vegjetarian, lë të kalojnë direkt tek hapi tjetër.
Shtoni domatet e prera hollë dhe majdanozin e grirë. Domatet, përpara se t’i grini, hidhini në ujë të nxehtë për disa minuta derisa t’u hapet lëkura. Hiqeni lëkurën e domates me thikë dhe tulin priteni në copa të vogla.
Është mirë ta shmangni lëkurën e domates sepse është pak e sikletshme gjatë ngrënies dhe aspak estetike në gjellë.
Shtoni, së fundmi, edhe tulin e patlixhaneve që hoqët mënjanë në fillim. Lëreni të zihen të gjitha se bashku për 10 minuta. Shtoni kripën dhe piperin e zi. Hiqeni nga zjarri, lëreni të ftohet pak dhe filloni dhe mbushni patlixhanët. Tepricën shpërndajeni midis patlixhanëve dhe sipër tyre.
Futeni në furrë, në 220°C dhe piqeni deri sa te marri një kore të lehtë të kuqe sipër.
