Kreu i PDIU-së Shpëtim Idrizi ka propozuar ndryshimin e ligjit për shtetësinë, në mënyrë që të gjithë ata që kanë origjinë shqiptare të diasporës të vjetër dhe të re të marrin nënshtetësinë shqiptare.
Në një takim me banorët e Korçës dhe Devollit, Idrizi ka ripërsëritur kërkesën për të ngritur një ministri për emigracionin.
Idrizi u shpreh se kjo ministri do t’i shërbejë 35% të shqiptarëve që jetojnë jashtë vendit.
“35% e shqiptarëve janë jashtë Shqipërisë. Shteti shqiptar nuk ka një institucion të fuqishëm që t’i drejtohet atyre, nevojave që ata kanë. Emigrantët kanë probleme në radhë të parë me përfaqësitë tona diplomatike, kanë probleme të ekzistencës për të ruajtur fëmijët e tyre, gjuhën shqipe dhe identitetin tonë kombëtar. Kjo është arsyeja pse ne kemi propozuar një ministri për Emigracionin apo një ministri të Diasporës.”– u shpreh Idrizi.
