“Ky propozim ka qenë pjesë e marrëveshjes me Edi Ramën, jemi parti e katër parlamentare”
Partia për Drejtësi, Integrim dhe Unitet, pretendon se duhet të përfaqësohet me një ministër në qeverinë Rama. Në një intervistë për “Vizion plus”, kryetari i PDIU-së Shpëtim Idrizi, argumentoi se posti i ministrit i takon kësaj partie sepse është forcë e katërt parlamentare.
Sipas Idrizit, ky propozim ka qenë pjesë e marrëveshjes me Edi Ramën, marrëveshje që Idrizi e cilëson “të dizenjuar”, por jo të nënshkruar. Kryetari i PDIU u shpreh se gjithsesi, partia e tij nuk do të presë çfarë do të japë Rama, por do të vijojë rolin e saj në Kuvend.
Shpëtim Idrizi vuri në dukje se në performancën e qeverisë ka një diferencë të madhe, mes asaj që është premtuar dhe asaj që është sot realitet. Lidhur me reformën në drejtësi, Idrizi tha se edhe partia që ai drejton, ka paraqitur disa propozime, të cilat u janë bashkangjitur sugjerimeve të mazhorancës.
