Nëna e 19- vjeçarit Erjon Xhenja që u ekzekutua disa ditë më parë në Shkodër në një lokal ku po konsumonte një kafe, ka reaguar lidhur me ngjarjen përmes një postimi në rrjete sociale. Ajo i bën thirrje shtetit që të marrë në mbrojtje familjen e saj ndërsa kërkon drejtësi për vrasjen e të birit.
Sipas saj, Erjon Xhenja nuk asnjë lidhje me raportimet në media dhe pistat e hetimit duke u shprehur se është cenuar dinjiteti i djalit të saj, pasi ai ishte një i ri me angazhime në jetën e tij personale dhe shoqërore. Nëna e viktimës, Elvira Xhenje fajëson për ngjarjen kushërinjtë e 19- vjeçarit që janë me precedent penale.
“Jam Elvira Xhenje, nëna e të ndjerit Erjon Xhenje ,të riut që u vra në Shkodër më dt18,09,2022. Vrasja e djalit tonë ka qenë një tronditje e madhe për familjen tonë, por jo vetëm. Dhimbjen për djalin tim e kam parë në sytë e gjithë prindërve që në sytë e mi kanë parë veten e tyre, sesi një fëmije të pafajshëm i merret jeta me pa të drejte. Dhimbjen për Erjonin e kam parë në sytë e të rinjve që e kuptojnë sesa e pasigurtë dhe e pa vlerë është jeta në Shqipëri. Fatkeqësia e djalit tim ishte se kushërinjtë e tij janë me precedentë penale. Ky fakt i dha të drejtën dorës kriminale që t’ia marrë pa mëshirë jetën djalit tim. Ky fakt i dha të drejtë portaleve që ta godasin për herë të dytë Erjonin duke cenu dinjitetin e tij me informacione të pavërteta dhe duke trazu shpirtrat e familjarëve sërish. Erjon Xhenje ka qenë student i degës fizioterapi. Ka qenë një i ri me angazhime në jetën personale dhe shoqërore. Erjoni është eduku me vlera dhe i ka manifestu në familje dhe në rrethin e tij të pastër shoqëror. Kërkoj nga shteti drejtësi për djalin tim. Kërkoj gjithashtu që familja ime të merret në mbrojtje pasi ndihemi të pambrojtur. Erjoni ka qenë një djalë besimtar. Jam e sigurtë që ai është lule në xhenet. Allahu e pastë në mbrojtje pasi në këtë jetë ka padrejtësi”, shkruan Elvira Xenja.
