E premte tragjike në Tiranë. Një i ri ka vrarë me tre plumba pistolete një vajzë dhe më pas ka qëlluar edhe veten.
Xhafer Mata, 31-vjeçar, ka qëlluar për vdekje shtetasen 19-vjeçare Xhuljeta Çuni, e më pas ka shtënë edhe ndaj vetes. Vajza ka ndërruar jetë në vend, ndërsa agresori është transportuar për në Spitalin e Traumës në gjendje të rëndë për jetën ku ka ndërruar jetë pas disa orëve.
Ngjarja është shënuar në zonën e “Don Boskos” në Tiranë, në afërsi të kishës, rreth orës 8:30 të mëngjesit të kësaj të premteje.
Mësohet se vajza, e cila ka pasur një lidhje me djalin nga Kukësi në të shkuarën, ka qenë maturante në gjimnazin “Qemal Stafa”, në kryeqytet. Ajo ishte nisu sot për të dhënë provimin e “Gjuhë-Letërsisë”.
Shoqet e Xhuljetës kanë treguar se Xhafer Mata, e kishte paralajmëruar të mos dilte në rrugë këto ditë, pasi do ta vriste.
Nga ana tjetër mësohet se maturantja e ka denoncuar 4 herë në polici 31-vjeçarin për përndjekje. Me premtimin se do ta linte të qetë vajzën, Mata i kishte shpëtuar ndjekjes penale dhe ishte lënë i lirë.
