Dinamika e ngjarjes me tre të vdekur në qendrën e Klosit ditën e sotme, ka marrë një tjetër kthesë. Gijotina.com ka zbardhur versionin e vërtetë. Burime pranë redaksisë së gijotina.com bëjnë me dije se shkak i kësaj ngjarjeje është bërë ngacmimi i vajzës së Fiqiri Mjeshtrit nga 17- vjeçari Kenad Shira dhe kushëriri i tij Renato Hasula, prej të cilëve e mitura kishte disa ditë që nuk shkonte në shkollë.
Në lokalin në qendër të Klosit, Kenad Shira dhe babai i tij Lir Shira kanë takuar Fiqiri Mjeshtrin dhe dy vëllezërit e tij Besnikun dhe Fatmirin për t’u sqaruar.
Gijotina.com raporton se në lokal ndodhej edhe 17- vjeçari Renato Hasula dhe babai i tij Euglen Hasula kushërinj me fisin Shira, ndërsa mësohet se lokali është në pronësi të Euglentit.
Duket se biseda degraduar në sharje e fyerje. Ata kanë dalë jashtë kafes, ku 39-vjeçari ka nxjerr pistoletën, duke shkaktuar dy viktima e dy të plagosur.
17- vjeçari Kenad Shira dhe babai i tij Lir Shira janë qëlluar me armë zjarri nga Fiqiri Mjeshtri në ambientet e jashtëm të lokalit, pas konfliktit mes tyre. Gijotina.com raporton se Kenad Shira ka tentuar të shpëtojë babain e tij duke i dalë para armës së autorit, dhe është qëlluar për vdekje.
Ndërsa Lir Shira ka ndërruar jetë rrugës për në spital, si pasojë e plagëve të rënda të marra në trup.
Nga breshëria e armëve, kanë mbetur të plagosur edhe kushërinjtë e Shirajve, 17- vjeçari Renato Hasula dhe babi i tij Euglent Hasula, të cilët mësohet se janë në gjendje kritike për jetën në spitalin e Traumës.
Gijotina.com raporton se menjëherë pas vrasjes, vëllezërit Mjeshtri janë larguar nga vendi i ngjarjes, ndërsa policia ka nisur kontrollet për arrestimin e tyre.
Pak minuta pasi janë shpallur në kërkim, Besnik dhe Fatmir Mjeshtri janë arrestuar, ndërsa autori që kreu vrasjen babai i vajzës, Fiqiri Mjeshtri vrau veten, në momentin që u pikas nga forcat e policisë.
Ngjarja u regjistrua rreth orës 14:00 në qendër të qytetit Klos. Theksojmë sërish se policia ka mundur të sekuestrojë armën e krimit dhe të arrestojë për ngjarjen Besnik Mjeshtrin dhe Fatmir Mjeshtrin dy vëllezërit e autorit të kësaj tragjedie. Besnik Mjeshtri rezulton se është punonjës i policisë bashkiake Klos. Dy të plagosurit, Eglantin Hasula dhe i biri 17- vjeçar Renato janë në gjendje të rëndë në spitalin e Traumës.
