Ylli Gurra, Myftiu i Tiranës ishte një nga kandidatët i cili humbi garën përballë Bujar Spahiut për kreun e Kominitetit Mysliman Shqiptar. Ai deklaroi para mediave se zgjedhja e kreut të ri nuk ishte shembulli më i mirë për shoqërinë shqiptarët dhe sipas tij kemi të bëjmë me kapjen e institucionit.
“Përkundër dëshirës sime për të drejtuar një komunitet mysliman të shqiptarëve për shqiptarët sot jemi para një fakti të një kapje të institucionit. Kryetari i komunitetit mysliman nuk mund të zgjidhet nga organizma okult. Jo shumë larg, vetëm pesë vite më parë kur i zgjedhur nën përgjejësin e kryetarit të përgjithshëm të Komunitetit mysliman të Shqipërisë, KMSH iu imponua një titullar, që në pesë vite që ju nuk keni parë asgjë në komunitet; veç humbje të tëra pronësisht, nisur nga qendra e Tiranës”, u shpreh Gurra në një deklaratë për median.
I pyetur më tej nëse ka patur influencë të jashtme, ai u përgjigj, “Kur thoni influencë të jashtme, ajo çka përmenda, organizëm okult, ata të cilët i kanë imponuar komunitetit mënyrën e zgjedhjes së anëtarëve dhe disa myftinjve edhe katapultimin e titullarit. Kjo organizatë dihet publikisht. Gylenistët apo Kemalistët nuk janë pa ndikime në këtë rrjedhë ngjarje dhe të tilla katapultime në krerët myslimanë të këtij vendit. Komuniteti nuk është peng i askujt, as i ndonjë qeverie. Në ditët e ardhshme do të ketë zhvillime. Nuk kam arsye që të jap dorëheqjen nga pozicioni i myftiut të Tiranës. Unë jam shqiptar, jam mysliman, ushtari i askujt, as në Anadoll as në një vend. I shërbej vendit tim pa asnjë ndikim nga okultët”, u shpreh Gurra.
