Nëna e Yevgeny Prigozhin, themeluesit edhe njëkohësisht shefit të grupit ushtarake ruse “Wagner”, u përjashtua të mërkurën nga lista e sanksioneve të Bashkimit Evropian nga Gjykata e Përgjithshme e bllokut.
“Pavarësisht se ky i fundit (Yevgeny Prigozhin) është përgjegjës për veprime që kanë cenuar integritetin territorial, sovranitetin dhe pavarësinë e Ukrainës, lidhja e zonjës Prigozhina me djalin e saj, e cila u krijua në kohën e miratimit të masave kufizuese, bazohet vetëm në marrëdhënien e tyre dhe për rrjedhojë nuk mjafton për të justifikuar përfshirjen e saj në masat kufizuese”, thuhet në vendimin e Gjykatës së Përgjithshme.
Violetta Prigozhina, 83 vjeç, iu shtua listës së sanksioneve të bllokut pas pushtimit të plotë të Ukrainës nga Rusia më 24 shkurt 2022, me shtetet anëtare të BE-së që argumentuan se ajo është pronare e disa ndërmarrjeve me lidhje me djalin e saj, si Concord Management and Consulting.
Organizata paraushtarake “Wagner”, e themeluar nga Prigozhin, ka lidhje të ngushta me Kremlinin dhe kryesisht vepron në mënyrë ilegale me akuza për krime lufte dhe shkelje të të drejtave të njeriut të raportuara në konfliktet e ndryshme ku ajo ka qenë e përfshirë si, Siri, Libi dhe Ukrainë, ku ka mbështetur separatistët pro-rusë që nga viti 2014.
Për vendet anëtare të BE-së, këto “lidhje” midis nënës dhe djalit nënkuptonin se ajo mbështeti veprimet dhe politikat që minojnë integritetin territorial, sovranitetin dhe pavarësinë e Ukrainës.
