Deklarata për përdorim dopingu nga tenistja ruse Maria Sharapova ka shokuar opinionin, por ka hapur edhe polemika që i kalojnë kufinjtë e sportit. Meldoniumi, që tenistja ka pranuar se e ka përdorur, është një medikament anti-ishemik që ka hyrë në listën e WADA-s që nga 1 janari dhe tani konsiderohet doping. Meldoniumi është prodhuar në Letoni dhe përdoret vetëm në vendet e ish-Bashkimit Sovjetik, ndrësa në perëndim nuk njihet absolutisht. Sipas mjekut Sergei Iliukov, i qendrës së mjeksisë sportive në qytetin finlandez Kuopio, flitet thjeshtë për një komplot. “Në perëndim shohin që atletët rusë përdorin diçka dhe megjithëse nuk e kanë idenë se çfarë është, arrijnë në përfundimin që duhet të jetë doping. Ky është thjeshtë mentaliteti i luftës së ftohtë”. Ndërkohë që krijuesi i Meldoniumit, Ivar Kalninsh nuk do të kërkojë nga WADA se përse medikamenti i tij ka përfunduar në “listën e zezë”. “WADA nuk kërkon fakte – ka thënë Kalninsh për agjensinë TASS – por vetëm merr vendime. Gjithçka po bëhet për të penalizuar atletët lindorë. Ata nuk kanë asnjë provë shkencore për të vërtetuar që ky medikament është doping”.
