Dokumentet për garën pranohen deri më datën 11 korrik 2016
Ndonëse banorët e kanë kundërshtuar me forcë, qeveria hedh një tjetër hap në ndërtimin e hidrocentralit. Tashmë ministria e energjetikës ka hapur garën për subjektet e interesuara ndërtuese, të cilat kanë si afat për të dorëzuar dokumentet e tenderit deri më 11 korrik të këtij viti. Por ndonëse ministria fton në koncesion operatorë ekonomikë, përpara të gjithëve në garë janë kompanitë turke Nurol dhe Suzer që kanë hyrë së bashku në këtë procedurë me një bonus prej 8 pikësh. Kohëzgjatja e kontratës koncensionare është parashikuar që të jetë 35 vjet. HEC-i i Katundit të Ri është i katërti mbi lumin Drin. Ai do ndërtohet në rrjedhën e sipërme të Drinit të Zi, në kuotat 400 deri 445 metra mbi nivelin e detit. Kompania turke në planifikimet e saj ka parashikuar ndërtimin e një hidrocentrali 70 megavat me një investim 110 milion euro.
