Dita e parë e bojkotit total të seancave gjyqësore në vend nuk u respektua në Gjykatën e Tiranës për seancat e masave të sigurisë. Ndonëse në orarin e paracaktuar nuk u paraqitën avokatë, në orët e mëvonshme pesë gjykime të tilla u zhvilluan gjatë së enjtes dhe burime zyrtare të gjykatës pohuan se në to pati prani të avokatëve.
Nga ana tjetër, më shumë se 60 seanca të gjykimeve në themel u braktisën nga avokatët, duke i çuar në pamundësi të zhvillimit. Ndonëse vendimi i Dhomës së Avokatisë është respektuar nga shumica e mbrojtësve ligjorë për të kundërshtuar hartën e re gjyqësore, ka prej tyre që nuk shohin bojkotin si zgjidhje të problemit.
Avokati Kola është kundër hartës gjyqësore të miratuar nga KLGJ, por, sipas tij, Dhoma e Avokatisë duhet ta trajtojë çështjen si një reagim në shërbim të avokatëve dhe jo në mbrojtje të interesave të qytetarëve.
“Unë mendoj që zgjidhja është institucional. Por realisht ne edhe sot që po flasim nuk kemi një formësim mediatik nga ana e Këshillit të lartë Gjyqësor apo të Ministrisë së Drejtësisë për këtë boshllëk që është krijuar. Në mbrojmë të drejtat e ligjshme të qytetarëve jo interesat e tyre, sepse avokatët nuk e kanë në kompetencë që t’ia ofrojnë apo t’i ndërtojnë infrastrukturën apo godinën qytetarëve. Dhe nuk mendoj që distanca sjell efikasitet në marrjen apo dhënien e drejtësisë”, tha avokati.
Në vendimin për bojkotin, Dhoma e Avokatisë saktësoi se thyerja e bojkotit do të konsiderohet si shkelje e rëndë dhe do të pasohet me procedim disiplinor të avokatëve.
