Kryeministri i Kosovës Ramush Haradinaj në një intervistë dhënë gazetës gjermane “Stuttgarter Zeitung”, ka theksuar sërish qendrimit të tij të prerë për kufijtë e Kosovës.
Përmes një postimi në Facebook, Haradinaj shkruan se hapja e çështjes së kufijve nuk do të destabilizonte vetëm Kosovën, por të gjithë rajonin.
“Në një intervistë dhënë gazetarit Thomas Roser, e publikuar në gazetat Die Presse, Stuttgarter Zeitung dhe Tageblatt, ndër të tjerash kam theksuar se Kosova nuk do të diskutojë për kufij dhe territore dhe se dialogu i udhëhequr nga BE do të duhej të çonte te një marrëveshje me Serbinë, përfshirë njohjen e Kosovës, por se ky rezultat nuk u arrit. Hapja e çështjes së kufijve nuk do të destabilizonte vetëm Kosovën, por të gjithë rajonin. Ne kemi përmbushur të gjitha kushtet për liberalizimin e vizave, por deri tani BE nuk realizoi pjesën e saj. Vendi ynë përshëndetë zgjidhjen e konfliktit për emrin midis Maqedonisë dhe Greqisë. Por, kjo energji mungon në lidhje me çështje të tjera të hapura në rajon.”
