Kryetari i Aleancës për Ardhmërinë e Kosovës (AAK) Ramush Haradinaj ka fajësuar kryeministrin Albin Kurti për vrasjen që ndodhi dje në Prishtinë, ku një grua 35-vjeçare që ishte në muajin e fundit të shtatzënisë u vra nga i shoqi.
Haradinaj thekson se Kurti është shndërruar në një bashkëpunëtor në krimet makabre që po ndodhin përditë.
Sipas tij, kryeministri e ka defunksionalizuar sistemin e drejtësisë në shtet duke i përgjysmuar pagat e gjyqtarëve e prokurorëve, ka poshtëruar policët, i ka lënë të leckosur e me paga mizerje, i ka detyruar mjekët ta braktisin punën e vendin sepse nuk mund të jetojnë nga puna e tyre, ka rrezikuar funksionalitetin e sistemit shkollor, duke i shtyrë mësuesit të hyjnë në grevë për më shumë se një muaj dhe vendin e ka shndërruar në gogol të komunitetit ndërkombëtar.
“Është dashur të ndodhë një krim makabër mbi një nënë dhe fëmijën e saj të palindur, që një popull i tërë të tmerrohet se deri ku ka shkuar krimi në këtë vend. E ndjera e kishte kërkuar ndihmën e shtetit, i cili fatkeqësisht së bashku me secilin prej nesh po vritet përditë e nga pak, por ai nuk e kishte mbrojtur. Burimi i së keqes e i krimit në këtë shtet e ka një shkak, e ka një burim dhe e ka një kokë!”, ka shkruar i pari i AAK-së.
“Kam qenë i pari që këtë kryeministër e kam quajtur ‘mashtrues’ dhe sot edhe ata që më kanë kundërshtuar më së tepërmi, kanë rënë në fjalë të mia. Nuk kisha pasur dëshirë të jem i pari që këtë kryeministër ta quaj edhe vrasës!”, ka shtuar ai.
