Hakerat iranianë janë bërë sërish aktiv disa ditë pasi publikun të dhënat personale të Drejtorit të Shërbimit Informativ të Shtetit, Helidon Bendo. Pas publikimit të të dhënave të Bendos, faqja e hakerave iranianë, ka publikuar edhe të dhënat e bashkëshortes së tij, Miranda Bendo.
Në të dhënat e publikuara, ashtu si për kreun e SHISH, shfaqen hyrje-daljet kufitare të bashkëshortes së tij gjatë viteve të ndryshme. Të dhënat e publikuara mbi Bendon, hakerat i kanë shoqëruar me shprehje nga Bibla.
“Ose ata tetëmbëdhjetë, mbi të cilët ra kulla në Siloam dhe i vrau, mendoni se ishin mëkatarë mbi të gjithë njerëzit që banonin në Jeruzalem. Unë ju them: Jo, por nëse nuk pendoheni, do të vdisni gjithashtu”, thuhet në publikimin e bërë. Nuk dihet se çfarë lidhje ka kjo shprehje me bashkëshorten e Bendos, apo nëse ky mund të jetë një kërcënim i mundshëm.
