Kërkresë për të rritur bashkëpunimin ekonomik dhe investimet
Guvernatori i Bankës së Shqipërisë, Gent Sejko, ka patur një takim zyrtar në mjediset e Bankës së Shqipërisë me
ambasadorët e vendeve të huaja të akredituar në Shqipëri. Në takim kanë qenë të pranishëm edhe përfaqësuesit rezidentë të institucioneve ndërkombëtare financiare në Tiranë.
Guvernatori Sejko ka prezantuar situatën makroekonomike të vendit, duke theksuar se Shqipëria ka shënuar një trend pozitiv në përmirësim të rritjes ekonomike. Ai ka konfirmuar angazhimin e Bankës së Shqipërisë për të mbështetur qëndrueshmërinë financiare të vendit. Në këtë kuadër, ai theksoi si mjaft të rëndësishëm vazhdimin e reformave strukturore, të cilat do të ndikonin në përmirësimin e mëtejshëm të klimës së biznesit dhe në përshpejtimin e zhvillimit ekonomik të vendit.
Një çështje me rëndësi të veçantë, e diskutuar gjatë takimit ishte dhe ngjallja e interesit për rritjen e bashkëpunimit ekonomik dhe vlerësimi i mundësive për nxitjen e investimeve të huaja direkte në vendin tonë. Në njoftimin e bërë nga BSH thuhet gjithashtu se në përgjigje të interesit të Ambasadorëve, Guvernatori ndau me ta pikëpamjet e tij mbi çështjet e ngritura të tilla si perspektivat e zhvillimit të vendit, pavarësia e bankës qendrore, perceptimi i realitetit ekonomik, ndikimi i reformës në drejtësi dhe përforcimi i zbatimit të ligjit, dhe integriteti i sektorit bankar. Në përfundim ambasadorët kanë vizituar edhe Muzeun e BSH.
