Basha: Përjashtimi i Berishës nga Kuvendi i mbyll derën reformave
Grupi Parlamentar i PD ka vendosur në një mbledhje të posacme të bojkotojë për 10 ditë punimet e Kuvendit. Vendimi është marrë pas përjashtimit nga Byroja e Kuvendit të Sali Berishës për një periudhë 10 ditore. Para fillimit të mbledhjes së grupit parlamentar demokrat, në një postim në FB, kryetari i PD-së Lulzim Basha shkruante se përjashtimi me 10 ditë nga parlamenti i ish kryeministrit Berisha është “shenjë e krizës së rëndë ku gjendet Edi Rama me të tijtë”. Sipas Bashës nuk bëhet për ti mbyllur gojën opozitës pasi në këtë proces ka dështuar por është manovër e Edi Ramës dhe Ilir Metës për ti mbyllur derën opozitës. “Për ti mbyllur derën në parlament, në tryezat ku ajo duhet të jetë e pranishme. Për ti mbyllur derën në reformën e drejtësisë, në reformën zgjedhore… Duke lënë opozitën dhe demokratët jashtë një salle, jashtë një tryeze, Edi Rama dhe Ilir Meta vetëm sa thellojnë izolimin dhe pershpejtojne renien e tyre te pashmangshme”, shkruante Basha në FB.
