Ajo lindi së bashku me njerëzimin dhe i dha esencë ekzistencës njerëzore.
Nga Pranvera Berati
Gruaja, esenca e ekzistencës njerëzore, i dha jetë jetës, ku falë saj njohëm dashurinë, brishtësinë, forcën dhe sakrificën. Ajo paragjykohet, gjykohet, shkelet, përulet, dashurohet, urrehet, goditet, por përsëri është e aftë të dashurojë të falë, të sakrifikojë, të harrojë dhe të japë pa kërkuar asgjë në këmbim.
Gruaja shqiptare ndër shekuj është emërtuar si qënie perfekte për rritjen e fëmijëve dhe përkujdesjen e shtëpisë. Detyra e saj ishte e thjeshtë; të përulej ndaj fjalës së mashkullit dhe të zbatonte urdhrat e tij. Fatkeqësisht edhe sot ajo me apo pa vetëdije ndodhet në të njëjtën situatë.
Të rastis shpeshherë të dëgjosh babain se vajza nuk duhet të frekuentojë më shkollën, por të krijojë një familje të shëndoshë. Të rastis shpeshherë të shohësh vëllanë t’i flakërijë një shuplakë motrës, se shkoi një të dielë në një festë me miqtë. Të qëllon shpeshherë të ndodhesh pranë një bashkëshorti, i cili dhunon bashkëshorten psikologjikisht, duke e emërtuar parazite dhe duke i ulëritur për keqprindërim.
Shumë meshkuj të tjerë nën ndikimin e alkoolit abuzojnë me bashkëshortet duke i lënë një shije të hidhur fëmijëve dhe plagë të rrënjosura në lëkurë dhe shpirt gruas.
Ka shumë gra, të cilat janë pre e abuzimit të përditshëm të bashkëshortëve, por paragjykimi dhe mentaliteti mbytës i shoqërisë i mban të lidhura dhe të dorëzuara ndaj dhunës. I tremben paragjykimeve dhe “epiteteve” të individëve thashethemixhinj. Të mos përmendim rastet ekstremiste, ku dora e hekurt e burrit ka dominuar në brishtësinë e femrës, duke i dhënë fund jetës së saj.
Femra, nga muza e poetëve, dalëngadalë po shndërrohet në (gjahun) e vrasësve, ku mashkulli posesiv i errësuar nga egoizmi dhe “trimëria “ nënshtron gruan, në të kundërt i merr jetën. Maskilizmi nuk e lejon ta shohë atë të fuqizuar, maskilizmi nuk e duron ta shohë të integruar në shoqëri, kurse nuk e toleron aspak refuzimin, jo më tradhëtinë. Egoizmi dhe ideja për ta konsideruar femrën si “pronë të tyre”, ku mund të bëjnë ç’të duan me të (ta godasin, ta duan ta gjykojnë, ta vrasin) arrin majat dhe “të kall datën”.
Mos e godit gruan, për asnjë arsye në botë, mos e dëno femrën për zgjedhjet e saj, mos e vrit gruan për shkaqe egoiste, “zotësi burrërore”.
Femra ka lindur për të mos qenë qënie perfekte, ka lindur për të qenë e lirë dhe e barabartë. Të gjithë gabojnë të gjithë tradhëtojnë,të gjithë veprojnë, ashtu siç ndjejnë, pse jo Ne??? Sepse, jemi Femra??? Mos harroni ne quhemi “Gra” dhe aftësia e gruas është të qëndrojë e fortë, nëpërmjet butësisë shpirtërore.
