Kompania është kreditori më i madh i keq në vend
Kompania ARMO është kthyer në më problematiket e tregut shqiptar. Dikur më e madhja në tregtimin e karburanteve sot është më e madhja në kreditorët e këqinj. Sipas të dhënave të ministrisë së energjetikës në fund të tremujorit të parë 2016, detyrimet e ARMO-s në total arritën në 595 milionë dollarë. Nga totali i detyrimeve afërsisht 300 milionë dollarë janë kredi bankare dhe pjesa tjetër e borxheve ndahet ndërmjet Albpetrolit, tatim-taksave, të tretëve dhe punonjësve.
Pak ditë më parë, kompania shtetërore e nxjerrjes së naftës, Albpetrol ka marrë në ruajtje rafinerinë e ARMO-s, në Ballsh. Lëvizja erdhi pasi . Albpetrol fitoi gjyqin në Gjykatën e Shkallës së Parë në Tiranë ndaj rafinerisë së përpunimit ARMO për një detyrim 30 milionë euro. Në proces gjyqësor janë dhe 20 milionë euro të tjera. Nga ana tjetër, punonjësit e ARMO-s prej ditësh janë në protesta pasi kanë gati një vit pa marrë pagat.
Pak javë më parë, një tjetër uzinë e përpunimit të naftës të rafinerisë së ARMO, u nxor në ankand për llogari të bankës Raiffeisen, për një kredi të pashlyer 20 milionë euro. Por ankandet dështuan dhe uzina ka kaluar në pronësi bankës Raiffeisen. Përveç Raiffeisen Bank, edhe Tirana Bank është vënë në radhë për të marrë borxhet e saj. ARMO është kreditori më i madh i keq në vend, në listën e 35 kompanive që kanë 60 për qind të huave me probleme.
