Vijon në ditën e 17 greva e urisë e grave naftëtare në Ballsh, të cilat shprehen të vendosura për të mos u tërhequr, pavarësisht thirrjeve të kryeministrit Edi Rama për ta mbyllur grevën dhe për t’u ulur në bisedime.
Gjatë natës së kaluar, grevistet kanë shfaqur probleme shëndetësore, kryesisht me tensionin.
Gjithashtu grevistet theksojnë se “heshtja e kryeministrit Rama është vrastare”.
“17 ditë grevë urie, kam lënë pas dy vajza që nesër do të duan të shkojnë në shkollë, por nuk kanë para. I kam thënë që mami do të vijë kur të fitoj djersën dhe gjakun. Përgjigja që më tha ishte mos u tall me fëmijët. Nuk e kuptoj se çfarë po bëjnë këta qeveritarë për naftëtarët. Heshtje vrastare…Vendimmarrja jonë është të vazhdojmë grevën për të marrë atë që na takon. T’i çojmë njëherë bukë fëmijëve dhe pastaj të negociojmë për punën”, u shpreh një nga grevistet gra.
