Sekretari i Përgjithshëm i Kujdesit Parësor Shëndetësor në Greqi Marios Themistokleous është shprehur sot se ekziston mundësia që Greqia të përballet me një valë të katërt të pandemisë. Në një dalje televizive ai u shpreh se e vetmja mënyrë për të mposhtur pandeminë janë vaksinat.
“Koronavirusi është këtu dhe nuk ka në plan që të largohet,” u shpreh ai ndërsa shtoi se sa më shumë qytetarë të vaksinohen aq më shpejt vendit do t’i kthehet normaliteti.
Ai sqaroi se Greqia ka një ndryshim të vogël në përqindjet e vaksinimit krahasuar me mesataren në Bashkimin Evropian. Në të njëjtën kohë, Themistokleous theksoi nevojën për të intensifikuar kontrollet për respektimin e masave kundër përhapjes së virusit.
Lidhur me dozën e tretë të vaksinës së koronavirusit, ai njoftoi se së shpejti do të vijë radha për ata nën 50 vjeç, pasi pritet analiza e të dhënave nga Komiteti Kombëtar i Vaksinimit.
Së fundi, Themistokleous i këshilloi qytetarët që nuk duhet të vijojnë që të bëjnë teste të antitrupave.
