70 emigrantë, përfshirë dhe fëmijë janë zbuluar këtë të mërkurë nga autoritetet greke në një pyll të mbuluar nga bora në qytetin verior të Selanikut.
Trafikantët duket se u janë rikthyer rrugëve të vjetra të njohura drejt Bashkimit Europian, në vend që të kalojnë përmes Mesdheut nga Turqia.
Pjesëtarë të këtij grupi, të cilët thonë se ishin nga Siria, deklaruan për policinë greke se kishin kaluar lumin Evros në kufirin greko-turk me anë të gomoneve, e më pas ishin dërguar për në Selanik të fshehur në një kamion.
Shoferi i kamionit i la ata në mes të pyllit orët e vona të së martës, duke bërë që ata të kalonin natën mes të ftohtit të acartë. Autoritetet bëjnë të ditur se shoferi është vënë nën kërkim policor.
