Lajmi mbërriti rreth orës 15: 12 minuta.
Paraprakisht mësohet se grabitësit kanë marrë një shumë të madhe parash, por ende nuk dihet sasia. Tre grabitësit e armatosur kanë arritur të marrin thasët me para në momentin që po bëhej transferimi i lekëve nga automjeti i sigurisë për në avion. Një makinë ka hyrë me forcë në pistën e aeroportit të Rinasit dhe më pas është larguar në drejtim të urës së “Gjolës”duke djegur dhe automjetin.
Dyshohet se bëhet fjalë për një shumë të konsiderueshme që do të eksportohej jashtë Shqipërisë nga kompani që operojnë në sektorin bankar.
Policia jep informacionin zyrtar të grabitjes
“Policia e Tiranës është njoftuar se rreth orës 14:45 në sheshin e brendshëm të fluturimeve të aeroportit “Nënë Tereza” ka ndodhur një grabitje me armë.
Menjëherë janë angazhuar shërbimet policore në aeroport dhe forca shtesë nga Drejtoria Vendore e Kufirit.
Nisur nga informacioni paraprak, raportohet se është grabitur nje sasi monetare, qe po transferoheshin me mjetet e SHPSF “Nazeri 2000”, nga terminali drejt avionit. Dyshohet se autorë të grabitjes janë të paktën 3 persona” informon policia.
Sipas deklaratës zyrtare të policisë grabitësit kanë hyrë në rrethimin e brendshëm të aeroportit, “pasi prenë menteshat e portës së jashtme që ndodhet nga krahu i rrugës Rinas – Fushë Krujë. Rrethimi i jashtëm sigurohet nga sherbimi i sigurise se kompanise private qe menaxhon aeroportin” nënvizon policia
Pasi kanë marrë sasinë e valutës, autorët janë larguar me shpejtësi. Gjatë ndjekies së autorëve policia ka gjetur të djegur mjetin tip “Benz”, që dyshohet se u përdor nga autorët.
Në ndihmë të policisë në tokë për ndjekjen e tyre është vënë edhe një helikopter policor për të kontrolluar zonën nga ajri.
Raportohet se rruga drejt Aeroportit është bllokuar.
Një ditë më parë policia deklaroi se kishte marrë masa të forta sigurie pas sulmeve në aeroportin e Stambollit.
