Pas mbledhjes së Komisionit të Ekonomisë, në të cilën prezantoi raportin e BSH për 2018, guvernatori Gent Sejko foli edhe lidhur me grabitjen e 9 prillit në Rinas.
Sejko tha se kjo ka ndikim negativ në imazh dhe sigurisht nëse ngjarje të tilla do të përsëriteshin shumë shpesh do të kishte një kosto jo vetëm për sistemin bankar por për të gjithë ekonominë shqiptare.
“Banka e Shqipërisë si institucion licensues është përgjegjëse për kërkesat minimale që bankat kanë për ambientet e tyre pra në objektet e tyre. Lidhur me transportin e vlerave monetare ka një udhëzim të Ministrisë së Brendshme, e cila si rregullore është forcuar. Ngjarja e fundit ka ndodhur në ambientet e aeroportit dhe jo gjatë transportimit. Masa e marra janë ndryshimet rregullative për këtë rregullore që ne e kemi përforcuar dhe sigurisht që përgjegjësia direkte e jona është për të monitoruar dhe mbikqyrur zbatimin e kërkesave të sigurisë së bankave në ambientet e tyre. Ajo që na shqetëson me shumë ne si BSH është përsëritja e këtyre ngjarjeve, ndikimi negativ në imazh, ndikim negativ psikologjik dhe sigurisht nëse ngjarje të tilla do të përsëriteshin shumë shpesh dhe ndikimi financiar do të bëhej shumë problematik dhe do të kishte një kosto jo vetëm për sistemin bankar por për të gjithë ekonominë shqiptare. ” -u shpreh Sejko.
