Detaje dhe foto të reja zbulohen për grabitjen e super-organizuar pranë aeroportit të Rinasit.
Mësohet se personi që ka mbetur i vrarë, një prej autorve të grabitjes, ka qenë qëllimisht i pakamufluar por kishte vendosur në kokë vetëm një maskë silikoni që të fshihte identitetin e vërtetë.
Ndërkohë furgoni i bardhë i përdorur nga grabitësit sot në aeroportin e Rinasit është tepër i ngjashëm me ata që përdor Drejtoria e Përgjithshme e Tatimeve.
Furgoni dyshohet se është përshtatur nga grabitësit me mbishkrimin “Drejtoria e Përgjithshme e Tatimeve” si dhe “Hetimi Tatimor” në pjesën e pasme për të ngjallur sa më pak dyshime.
Madje edhe lloji i shkrimit dhe logot janë të njëjta me forgonat e përdorur nga DPT-ja. Autorët kishin planifikuar ta digjnin furgonin pa targa, por pas shkëmbimit të zjarrit me policinë, ku mbeti i vrarë një prej tyre, e braktisën dhe u larguan me mjete të tjera.
Mesa duket plani i autorëve të grabitjes ka qenë i mirëorganizuar dhe i menduar deri në detaje, që nga furgoni i përdorur e deri tek veshja e tyre.
