Zbardhen detaje të reja nga grabitja me armë e postës në Kamëz disa ditë më parë. Autori i arrestuar Elis Suçi dyshohet nga policia si vrasës me pagesë.
Bëhet gjithashtu me dije se 30-vjeçari dyshohet të jetë paguar nga anëtarë të grupeve kriminale për të kryer vrasje. Për këtë, hetuesit po kryejnë veprime për ngjarjet e pazbardhura të ndodhura gjatë vitit 2021, periudhë që korrespondon me daljen e tij nga burgu.
Ndërsa pistoleta që iu gjet dje me vete gjatë arrestimit, u dërgua në laborator për të parë nëse është përdorur në ndonjë ngjarje.
Suçi ishte në kërkim edhe për disa grabitje të tjera të ndodhura në Kamzë gjatë muajve të fundit. Por, gjatë kësaj kohe ai ka jetuar në hotele të ndryshme në zonën e Medresesë.
Gjatë arrestimit pasditen e së mërkurës në afërsi të kësaj zone, Elis Suçi kërcënoi sërish uniformat blu. Pistoletën që mbante me vete e kishte me fishek në gojë, e cila ju hoq menjëherë nga policia.
