Policia e Shtetit nxjerr emrat e personave të arrestuar nga grabitja e bankës në Koplik. Nga informacionet e përcjella nga Uniformat Blu, njëri prej tyre mbante radio policie dhe prej disa ditësh survejonte.
Personat e arrestuar janë shtetasit, Bekim Gurraj, Amir Shabaj dhe Admir Shabaj. Këta persona në bashkëpunim me njëri tjetrin dhe nën kërcënimin e armës së zjarrit kanë hyrë në bankë dhe kanë marrë shuma parash. Autorët kanë përdorur dy armë zjarri dhe një automjet Golf 3. Pas grabitjes e kanë djegur automjetin në rrugë. Pas ngjarjes armët i kanë hedhur në ujë. Pas kontrolleve është gjetur arma kallashnikov dhe policia vazhdon kërkim për armën tjetër.
“Në banesën e Bekim Gurrajt janë gjetur dy radio marrëse si ato të policisë, bluzë dhe kapele si ato të policisë si dhe veshjet e përdoura nga ai disa ditë më parë gjatë survejimit në ambientin e jashtëm të bankës. Po në vijim të operacionit në banesën e Albin Shabaj janë gjetur 9 kg kanabis. Për këtë u arrestua në flagrancë u Albin Shabaj, vëllai dhe babai i tij”, deklaron policia.
