Një çift të moshuarish në Gjirokastër është grabitur në orët e para të mëngjesit të sotëm në lagjen e njohur si Kodra e Shtufit.
Dy grabitësit kanë hyrë nga dritarja e tualetit të banesës në katin e parë të pallatit dhe kanë mbajtur peng për dy orë çiftin e të moshuarve duke kërkuar me ngulm që t’i jepnin paratë që mbanin në banesë.
Mësohet se 78-vjeçari Laze Shehu ka treguar se ata i kanë keqtrajtuar e madje kanë tentuar t’i mbysin. I gjendur përballë presionit dhe dhunës fizike, Shehu ia ka dhënë atyre 180 mijë lekë të vjetra të cilat i kishte ruajtur për qiranë e banesës ku jetojnë.
Pasi kanë marrë paratë dy grabitësit e maskuar i kanë qëlluar me grushte dhe janë larguar nga banesa duke sharë.
Çifti i të moshuarve kanë njoftuar policinë e cila ka shkuar menjëherë në vendngjarje.
Bëhet me dije se deri më tani janë shoqëruar në polici 4 persona si të dyshuar lidhur me këtë ngjarje.
