Ish-zyrtari i lartë i Kuvendit të Shqipërisë, Ricard Marku është dënuar me 1 vit burg nga Gjykata e Tiranës për akuzën e shpërdorimit të detyrës.
Vepra penale për të cilën është fajësuar ish-drejtori i Shërbimeve të Komisioneve të Kuvendit, dyshohet të jetë kryer në harkun kohor 2009- 2010. Sipas gjykatës, Marku ka lejuar që një vartës i tij të paguhet rregullisht nga Kuvendi, ndonëse ky i fundit nuk është paraqitur për gati 10 muaj në punë.
Sipas hetimeve në vitin 2015 strukturat e Kuvendit kanë konstatuar faktin se D. G., një nga këshilltarët e Komisionit të Integrimit Europian, ishte paguar rregullisht, ndonëse në periudhën shtator 2009-korrik 2010 kishte kryer një studim master në Itali. Sipas vendimit, këshilltari D. G. kishte kërkuar leje pa të drejtë page për shtator-tetor 2009, leje e cila i ishte miratuar. Nga ana tjetër, pas daljes nga vendi, ai është kthyer gati 10 muaj më vonë.
Gjykata vendosi përfundimisht pezullimin e ekzekutimit të dënimit të tij me burg për Markun, duke e lënë atë në shërbim prove për një periudhë prej 18 muajsh.
