Fluksi i lartë bën të pamundur respektimin e afateve ligjore
Edhe pse u pa si një zgjedhje për morinë e çështjeve gjyqësore në pritje, Gjykata Administrative është e mbuluar nga numri i dosjeve në pritje. Shifrat e vitit 2015 tregojnë se sa e pamundur është që të jepen vendimet brenda afateve të përcaktuara ligjore. Shifrat tregojnë se Gjykata Administrative nuk po arrin të përmbushë qëllimin për të cilin u krijua, atë të shqyrtimit të çështjeve brenda një periudhe 30 ditore. Gjatë vitit 2015 një gjyqtar i Gjykatës Administrative gjykoi mesatarisht 431 çështje një shifër rekord kjo, gjë që tregon fluksin e lartë me të cilin janë përballur togat e zeza të kësaj gjykate. Të dhënat tregojnë se në total për vitin e kaluar në Gjykatën Administrative të Apelit u regjistruan 14,313 çështje. Nga këto dosje rreth 6,500 çështje ishin të mbartura nga viti 2014. Pjesa më e madhe e çështjeve që kanë mbërritur në Apel kanë qenë nga shkalla e parë e Tiranës me rreth 3,800 e ndjekur më pas nga ajo e Vlorës me mbi 1,000 çështje.
