Aktivistja Lorisa Ylli ka denoncuar sërish publikisht punimet që vazhdojnë në Sheshin “Veliera”, megjithëse ka tashmë një vendim gjykate, kurse sheshi i ndërtimit prej tre ditësh është bllokuar nga Prokuroria.
Pavarësisht kësaj matrapiku vazhdon. Aktivistja bën denoncimin publik dhe 27.al e boton të plotë, pavarësisht se mallkimet në këtë rast janë të tepërta, sepse familjarët e përgjegjësve të këtij krimi nuk ka përse përfshihen në mërinë e aktivistes, e cila duket qartë që i ka ardhur në majë të hundës me arrogancën e pushtetit.
Denoncim Publik për Policinë e Shtetit dhe ministrin e Brendshëm:
Veliera prej 3 ditësh është e bllokuar nga Prokuroria dhe prej 1 muaji me Vendim Gjykate është e ndaluar të bëhet çfarëdo gërmimi nga Bashkia apo kompania “Everest” e kontraktuar nga Bashkia Durrës. Vetem IMK për gërmimet e zbulimeve arkeologjike ka të drejtën e ndërhyrjes, por jo të zhvendosjes së objekteve të gjetura!
Sot (të mërkurën), në orën 19.30 në shkelje të plotë kompania “Everest” u kap nga unë personalisht duke gërmuar me matrapik zonën arkeologjike nga ku u njoftua dhe Prokuroria e Rrethit Durrës, e cila veproi menjëherë për ndalimin e gërmimeve. Ky është një akt i turpshëm dhe përgjegjëse direkte është Policia e Shtetit për shpërdorim detyre, por këtu ka dhe përgjegjës akoma më të fuqishëm, sepse shpërdorimi i detyrës bëhet me urdhër të KM Edi Rama!
Në një kapje të tillë flagrante duhet të kishin filluar arrestimet nga dashamirësi i Vetting-ut!
As ne si qytetarë dhe as Prokuroria nuk bën rojen e zbatimit të ligjit. Me këtë merret Policia e Shtetit!
Nëse Shqipëria 50 vite vuajti komunizmin, sot po vuan pushtimin mafioz, ku as në vendet më problematike, mafia nuk ka pasur veton deri për arkeologjinë e qytetarëve! Ju jeni më keq se ISIS! Turp! Ju nuk keni, por gjetshit belanë në kokat tuaja dhe familjarëve tuaj (aty ku ju dhemb dhe pse dyshoj dhe për këtë) që po na katandisni si mos më keq çdo ditë!
