Nga Brukseli, ku mori pjesë në konferencën “Një e ardhme më e mirë për Rininë në Ballkanin Perëndimor”, Ministrja e Integrimit, Klajda Gjosha, ka ftuar politikën të ndjekë ritmin e të rinjve për të forcuar dialogun politik, por edhe për t’iu afruar më shpejt BE. Gjosha kërkoi më shumë impenjim të të rinjve në të gjithë proçesin integrues.
Ministrja e Integrimit, Klajda Gjosha, ka ftuar politikën të nxitojë për të kapur ritmin e të rinjve për t’iu afruar më shpejt Europës, por edhe për të forcuar dialogun politik në vend.
Gjosha mori pjesë në konferencën “Një e ardhme më e mirë për Rininë në Ballkanin Perëndimor” organizuar në Bruksel nga eurodeputetët, Tanja Fajon dhe Franc Bogoviç, ku kërkoi më shumë inkurajim të të rinjve.
Gjosha: Historia ka treguar se ne jemi vende ku dialogu politik është shumë i çalët dhe ka një problematikë të theksuar në këtë këndvështrim, por rinia na mëson ndryshe dhe na jep mundësinë të mendojmë se vendi do të jetë ndryshe nesër, ku dialogu politik do të lulëzojë.
Sipas Gjoshës është detyrim dhe përgjegjësi e politikbërësve dhe përfaqësuesve të Qeverisë të motivojnë të rinjtë.
Gjosha: Të ftohen të rinjtë të jenë sa më shumë aktivë në forumet politike. E them këtë sepse politika jonë nuk është e përjetshme, askush nga ne nuk ka lindur Ministër dhe nuk do të vazhdojë më tej si Ministër. Kështu që do të ketë një rotacion dhe ai i takon pikërisht rinisë, sa më aktivë të jenë ata, sa më të angazhuar politikisht, sa më mirë të njohin ata problemet e vendit të tyre, problemet e rajonit dhe më tej politikën e jashtme, unë them që kjo do ti shërbejë një politike më të mirë.
Ministrja Gjosha theksoi se nuk ka integrim më të mirë të një shoqërie sesa përmes një edukimi të mirë, formimi profesional, pasi të gjitha këto rrisin perspektivën dhe krijojnë më shumë mundësi punësimi në përputhje me tregun e punës.
