Gjatë vizitës zyrtare në Bruksel, ministrja e Punëve të Jashtme dhe Diasporës, Donika Gërvalla, është pritur sot në takim nga ministrja e Punëve të Jashtme, Çështjeve Europiane dhe Tregtisë së Jashtme të Belgjikës, Hadja Lahbib.
Gjatë takimit, dy ministret diskutuan një numër çështjesh bilaterale, përfshirë bashkëpunimin në fushën e ekonomisë, procesin e integrimeve euro-atlantike të Kosovës, si dhe zhvillimet në rajonin e Ballkanit Perëndimor. Gërvalla dhe Lahbib këmbyen mendimet dhe pikëpamjet rreth zhvillimeve globale dhe efekteve të tyre në rajonin e Europës Juglindore, por edhe në gjithë kontinentin europian, si dhe diskutuan rrugët për forcimin e bashkëpunimit bilateral në fushat e interesit të përbashkët.
Sipas njoftimit të MPJD-së temë e veçantë e diskutimeve ishte edhe avancimi i integrimit të Republikës së Kosovës në Këshillin e Europës dhe Bashkimin Europian, procese këto për të cilat ministrja Gërvalla u shpreh mirënjohëse për përkrahjen parimore të Belgjikës.
Ministret Gërvalla dhe Lahbib shprehën edhe përkushtimin e dyanshëm për avancimin e mëtutjeshëm të marrëdhënieve mes Kosovës dhe Belgjikës, me theks të veçantë në shfrytëzimin e një diaspore të rëndësishme kosovare në Belgjikë si urë lidhëse shtesë mes dy vendeve tona./RTK
