Guvernatori i Bankës së Shqipërisë Gent Sejko thotë se ekonomi botërore dhe ajo shqiptare do të vijojë të goditet për shkak të luftës. Ai është shprehur se inflacioni është rritur ndërsa ekonomia po ngadalësohet. Sejko më tej ka thënë se rritja e inflacioni u ndikua nga shtrenjtimi i naftës dhe i ushqimeve.
“Ekonomia botërore dhe ajo shqiptare do vijojë të goditen nga lufta. Goditja ka rritur çmimet dhe shtuar pasigurinë. Inflacioni është rritur ndërsa ekonomia po ngadalësohet. Inflacioni do jetë gjatë mbi objektiv, ndërsa goditja e ofertës do jetë më e fortë sesa ishin pritshmëritë. Konflikti në Ukrainë dhe sanksionet kanë sjellë ndërprerje në prodhim dhe shpërndarje. Bankat kanë shtrënguar politikat. Në tremujorin e parë të vitit inflacioni ishte 4.4%. Rritja e inflacioni u ndikua nga shtrenjtimi i naftës dhe i ushqimeve. Rritja e normës së interesit ka favorizuar stabilizimin e kursit të këmbimit. Por efekti i saj nuk është shfaqur ende i plotë. Përgjatë vitit 2022 inflacioni do të jetë në kushtet aktuale. BSH do të monitorojë me kujdes rritjen e inflacionit dhe mbetet i gatshëm për të ndërhyrë nëse do të jetë e nevojshme. Pavarësisht pasigurisë politika monetare do të jetë stimuluese për gjithë periudhën në vijim” – tha Sejko.
