Sekretari i Përgjithshëm i PD, Gazmend Bardhi ka publikuar një video nëpërmjet të cilës tregon se sipas tij ish-ministri i Brendshëm Saimir Tahiri është mbrojtur nga kryeministri Edi Rama.
Ai gjithashtu shprehet se qeveria Rama e shndërroi Shqipërinë në “Kolumbinë e Evropës” dhe në vendin më të korruptuar.
“Edi Rama mbrojti Saimir Tahirin sepse është edhe vetë i kapur ‘kokë e këmbë’ nga krimi. Edi Rama nuk thotë dot asnjë fjalë sepse ai e di që të gjitha fijet e krimit dhe trafiqeve lidhen te ai.
Ai kishte të gjithë informacionin nga institucionet shqiptare dhe partnerët, por e mbrojti Sajmir Tahirin dhe ministrat e tjerë të tij sepse ishte ai garanti i krimineleve të cilët i siguronin vota”, thotë ndër të tjerash Bardhi.
Bardhi thekson se Partia Demokratike është në mbështetje të plotë të SPAK dhe pret që të veprojë me vendosmëri e pa u ndalur ndaj kujtdo që ka shkelur ligjin dhe e ka shndërruar Shqipërinë në vendin më të korruptuar të Evropës.
