Protesta e opozitës së bashkuar e mbajtur dy ditë më parë nuk kaloi pa “dhunë” dhe shoqërime të qytetarëve, të cilët po hetohen nga autoritetet për veprime antiligjore.
“Qytetarët kanë qenë të pranishëm të shumtë në numër dhe – përveç një numri të vogël e të veçuar individësh – në një shumicë dërrmuese qytetarët janë shfaqur të qetë dhe të paangazhuar në akte kërcënuese për rendin, qetësinë dhe sigurinë publike”, thuhet në deklaratën e Avokatit të Popullit.
Ndërkohë në deklaratë thuhet se nga verifikimet paraprake të ekipit monitorues është konstatuar se forcat e ruajtjes së rendit në përgjithësi e kanë menaxhuar me rregullsi protestën, pa u angazhuar në ushtrim dhune mbi qytetarët protestues.
Por nga ana tjetër bën me dije se Avokati i Popullit, në datë 17/2/2019 u ka drejtuar kërkesa zyrtare autoriteteve të Policisë së Shtetit dhe Gardës së Republikës, për të dhënë sqarime mbi llojin, sasinë, përqendrimin, përbërjen dhe prejardhjen e këtyre lëndëve.
Sipas këtij institucioni, ka patur ankesa të shumta nga qytetarët për gazin lotsjellës që është pqërdorur nga garda në protestë.
Sipas Avokatit të popullit, përfaqësues të këtij institucioni janë lejuar të takojnë 16 të arrestuarit e pas protestës së 16 shkurtit ku 15 prej të cilëve nuk kanë dëshmuar se mund të jenë keqtrajtuar ndërkohë që vetëm njëri prej tyre ka raportuar një seri shkeljesh nga ana e Policisë së Shtetit gjatë operacionit për ndalimin e tij, pamje filmike të të cilit janë publikuar edhe në disa media.
Bëhet fjalë për Florenc Hoxhën i cili në kohën kur basha drejtonte bashkinë e Tiranës ai drejtonte Policinë Bashkiake.
Sipas Avokatit të Popullit, përtej dhunës verbale dhe fizike të evidentuar në pamjet filmike, raportet mjekësore dhe kontaktin fizik vizual me shtetasin F.H., verifikimi i pretendimeve për shkelje të procedurave në ndalimin e këtij shtetasi si dhe i kryerjes së kontrolleve në kundërshtim me procedurën ligjore të parashikuar nga ligji, cenon rëndë të drejtat e tij kushtetuese.
“Pasi është dërguar në ambientin e shoqërimit të DVP Tiranë, qytetari është vizituar nga mjeku i këtij institucioni i cili ka rekomanduar që të dërgohet në Spitalin Ushtarak të Traumës për të marrë ndihmë mjekësore, sepse sipas atij goditjet në pjesën e kafkës prapa veshit ishin të rrezikshme për jetën. Pas rekomandimit të mjekut ai është dërguar në Spitalin Ushtarak dhe ka bërë ekzaminimet përkatëse ndërmjet të cilave skaner, si dhe ka marrë serum”, – shkruhet ne deklaratë.
