Ambasadori i OSBE-së në Tiranë, Michel Tarran, ka vlerësuar rëndësinë e gazetarisë si një institucion kyç për llogaridhënien dhe forcimin e demokracisë, duke theksuar se sfidat me të cilat përballen mediat sot janë të përbashkëta në të gjithë Europën dhe më gjerë.
Gjatë fjalës së tij në një konferencë kushtuar medias dhe sigurisë së gazetarëve, Tarran tha se rënia e besimit tek institucionet dhe korrupsioni mbeten ndër problemet kryesore që ndikojnë negativisht në shoqëri dhe në funksionimin demokratik.
Ai theksoi se përpjekjet për mbrojtjen e lirisë së medias duhet të jenë të koordinuara dhe të bazuara mbi vlerat demokratike.
“Më vjen mirë që shoh një grup pjesëmarrës këtu, gazetarë, përfaqësues të shoqërisë civile dhe vendimmarrës. Tema e kësaj konference është në kohën e duhur, gazetaria është institucion ku duhet të jepet llogari. Hapësirat për publikun në Europë dhe kudo po marrim forma të reja.
Ne shohim se sa të përbashkëta janë këto sfida. Rënia e besimit te institucionet, korrupsioni, janë pasoja që rëndojnë ndaj nesh. Përpjekjet tona duhet të koordinohen mbi baza demokratike. Duhet të mbështesim lirinë e medias, duke përmirësuar kuadrin ligjor, duke nxitur dialogun. Siguria sot nuk është çështje territoresh, por çështje hapësirash.
Më lejoni që t’ju tërheq vëmendje te Shqipëria. Janë marrë masa për përmirësimin e punës për gazetarët. Pronësia e medias, transparenca, detyrimet, janë përmirësuar. Komuniteti i medias në Shqipëri është aktiv.
Zëri i tyre duhet të dëgjohet dhe ata të angazhohen. Nevojitet për të forcuar transparencën dhe mbrojtjen ligjore. Gazetarët duhet të punojnë në kushtet më të larta dhe brenda etikës. Prezence e OSBE do të vazhdojë të punojë më shumë për forcimin e rolit të gazetarëve”, tha diplomati Tarran.
Ndërsa përfaqësuesi i OSBE për Lirinë e Medias, Jan Braathu theksoi se liria e medias është e domosdoshme për demokracinë.
“Vetë gazetarët po përballen me rritje të kërcënimeve. Liria e medias është themeli i demokracisë. Gazetaria si e mirë publike është thelbësore. Është me rëndësi që të diskutohet lidhur me këtë çështje. Pas sigurinë nuk ka gazetarë të lirë, nuk ka media të lirë. Kërcënimet ndaj gazetarëve nuk duhet të kalojnë pa u ndëshkuar”, u shpreh ai.
