Gazeta DITA ka lajmëruar sot përmes një artikulli dorëheqjen e mundshme të ministrit të Brendshëm Saimir Tahiri. Gazeta shkruan se i referohet burimeve pranë qeverisë.
Artikulli i plotë:
Ministri i Brendshëm Saimir Tahiri është në prag të dorëheqjes. Burime pranë qeverisë thanë për DITA, se z.Tahiri pritet të dalë gjatë ditës së sotme për të deklaruar dorëheqjen nga posti.
I cilësuar nga opinioni publik si një nga ministrat më të suksesshëm të kabinetit Rama, Tahiri ishte vënë prej kohësh në qendër të akuzave të PD-së dhe opozitës.
Dorëheqja e tij shihet si një lëvizje e përgjegjshme e mazhorancës për të zgjidhur krizën politike të provokuar nga PD, krizë e cila ka bllokuar jo vetëm jetën parlamentare, por edhe raportet e Shqipërisë me SHBA dhe BE.
Me heqjen e alibisë “Tahiri” dhe retorikës për përdorimin e policisë në zgjedhje, pritet të shihet nëse opozita do dalë nga çadra dhe do votojë Reformën në Drejtësi, mosvotimi i së cilës shihet masivisht si arsyeja e vërtetë e protestës.
