Disa shoferë problematikë në Tiranë janë penalizuar nga policia pasi janë konstatuar me shkelje të rregullave në qarkullim.
Qytetarët të shumtë kanë kërkuar ndihmën e Policisë, pasi disa persona kryenin “gara” të vazhdueshme në zonën e unazës së madhe duke vënë në rrezik jetën e tyre si dhe duke prodhuar zhurmë akustike.
Nga monitorimi i policisë u faktua se shtatë shoferë garonin mes tyre, ndërsa janë vendosur edhe 67 masa të tjera administrative për shkelje të ndryshme gjatë veprimeve policore.
Njoftimi i policisë:
Në numrin 112, Komisariatin Dixhital apo në adresa të tjera zyrtare të Policisë së Shtetit, ditët e fundit nga ana e banorëve të zonës së unazës së madhe, janë adresuar shqetësime dhe ankesa të shumta mbi zhurmat që shkaktohen nga automjetet kryesisht sportive, që nëpërmjet sistemeve zhurmëshkarkuese, shpejtësisë së madhe apo garave ndërmjet tyre.Këto veprime të disa drejtuesve të mjeteve janë kthyer jo vetëm në shqetësim për banorët e zonës, por edhe një rrezik i shtuar për ngjarje rrugore që për shkak të mënyrës se si drejtohen dhe shpejtësisë së madhe, mund të jenë fatale për jetën dhe shëndetin e qytetarëve.
Me qëllim ndëshkimin e këtij fenomeni sa shqetësues aq edhe të rrezikshëm, si dhe parandalimin e aksidenteve, Policia Rrugore e kryeqytetit në bashkëpunim me sektorin e forcës së posaçme “Shqiponja” dhe “Shigjeta”, ka monitoruar dhe dokumentuar me agjentë civilë apo të uniformuar një sërë shkeljesh në këtë segment rrugor dhe ka proceduar e dërguar praktikat për gjykim në Organin Administrativ Shtetëror, pranë Drejtorisë Vendore të Policisë Tiranë, për 7 drejtues mjetesh që “garonin” me shpejtësi thuajse dyfishin e asaj të lejuar.
Për 12 drejtues mjetesh është bërë verifikimi me radar dhe tërheqja e lejes së drejtimit, pasi janë konstatuar duke qarkulluar mbi normat e lejuara, si dhe janë vendosur 67 masa të tjera administrative për shkelje të ndryshme gjatë veprimeve policore.#ShpejtesiaeLarteVret#.
