Procesi i numërimit të votave në degën e Partisë Demokratike në Kukës përfundoi me fitoren e Rrahman Demajt, i cili mori 642 vota, ndërsa rivali i tij Sabah Cenaj siguroi 273 vota.
Në votim morën pjesë 927 anëtarë nga rreth 1700 të regjistruar, duke treguar një pjesëmarrje të konsiderueshme. Pas shpalljes së rezultatit, Demaj falënderoi mbështetësit dhe u shpreh i vendosur për të bashkuar strukturat dhe për të forcuar degën.
Nga ana tjetër, Sabah Cenaj pranoi rezultatin dhe e cilësoi procesin të rregullt. Ai theksoi rëndësinë e unitetit brenda partisë pas garës. Ndërkohë, drejtuesi politik Flamur Hoxha përgëzoi të dy kandidatët dhe nënvizoi se prioritet mbetet forcimi i Partisë Demokratike dhe përballja me sfidat politike në vijim.
Demokratët e Hasit zhvilluan sot zgjedhjet për kreun e ri të degës në një proces të qetë dhe të rregullt, i cili nisi në orën 08:00 dhe përfundoi në orën 18:00.
Pas përmbylljes së numërimit të votave, fitues u shpall Urim Dauti, i cili siguroi 727 vota. Ndërkohë, rivali i tij, Nezir Lushi arriti të marrë 56 vota. Në total morën pjesë në votim 791 anëtarë të degës.
Nga këto, 8 vota u shpallën të pavlefshme. Procesi u vlerësua si korrekt dhe në përputhje me rregullat nga pjesëmarrësit.
Deputeti i Partisë Demokratike, Belind Këlliçi ka njoftuar përmes një postimi në rrjetet sociale zhvillimet më të fundit brenda strukturave të Partisë Demokratike në Degën 15 në kryeqytet, që përfshin zonat Vaqarr, Pezë dhe Ndroq.
Sipas njoftimit, anëtarët e kësaj dege kanë konfirmuar me votë zgjedhjen e Florind Mansaku si kryetar i degës për një mandat 4-vjeçar. Në rrjete sociale, Këlliçi i ka uruar suksese Mansakut në detyrën e re, duke vlerësuar gjithashtu edhe kandidatin tjetër, Gentian Shkreta, për fushatën dhe angazhimin e tij në strukturën lokale.
Në fund të postimit, ai ka bërë edhe një thirrje për mobilizim më 8 maj përpara Kryeministrisë, në kuadër të aksioneve politike të opozitës kundër qeverisë Rama.
“Anëtarët e Degës Tirana 15, Vaqarr, Pezë, Ndroq, konfirmuan sot me votë Florind Mansakun si kryetar dhe për 4 vite. Duke i uruar suksese zotit Mansaku, përgëzoj Gentian Shkretën për fushatën civile që bëri dhe për angazhimin e tij të palodhur në këtë strukturë. Demokratët e degës 15 vijnë të bashkuar dhe me energji të reja për betejat historike që kemi përpara, deri në rrëzimin e regjimit të korruptuar e kriminal të Edi Ramës. Më 8 Maj shihemi të gjithë para kryeministrisë!”,shkruan Këlliçi.
gijotina.com/
