Përplasja në studion e Top Story mes Alfred Lela dhe Grida Duma degjeneroi në një nga momentet më të tensionuara televizive të kohëve të fundit, duke çuar në largimin e Lelës nga emisioni në mes të transmetimit.
Debati nisi fillimisht me tone të forta, por brenda pak sekondash kaloi në përplasje personale. Lela vuri në dyshim qasjen e moderatores, ndërsa Duma reagoi duke theksuar rolin e saj si drejtuesja e studios dhe kufijtë që duhen respektuar në një debat publik.
Situata u përshkallëzua kur Lela përdori një gjuhë sfiduese dhe provokuese, duke ironizuar kontrollin e moderatores mbi emisionin. Kjo solli reagimin e menjëhershëm të Dumës, e cila e konsideroi komunikimin të papranueshëm dhe jashtë etikës televizive. Ajo i kërkoi drejtpërdrejt të largohej nga studio, duke theksuar se nuk do të toleronte tone fyese apo sjellje që cenojnë standardin e debatit publik.
Pjesë nga debati që ndezi përplasjen:
Grida Duma: “Top Channel të do ty këtu për të thënë të vërtetën.”
Alfred Lela: “Pse çfarë ishte e pavërtetë? Topi është i joti, penalltinë gjuaje vetë.”
Grida Duma: “Se çdo ‘Topi’ ta tregoj unë tani. Te fusha ime nuk gjuan dot penallti ti.”
Alfred Lela: “Gishtin mos ma drejto mua se nuk jam nxënësit yt, as rrogëtari jot. Atë gishtin gjej vend e fute, ose fute ku të duash.”
Grida Duma: “Të nxjerr ty dhe shumë të tjerë që flasin kështu nga studio.”
Grida Duma: Ti je opinionist i ftuar. Ta drejtoj gishtin sa herë të dua dhe të nxjerr jashtë sa herë të dua. Gishtin fute ti…
Alfred Lela: Unë iki.
Grida Duma: Ik dil përjashta
Pas këtij momenti, situata doli jashtë kontrollit dhe ndërhyrja e moderatores u bë përfundimtare: Lela u detyrua të largohej nga studio, duke e mbyllur debatin në mënyrën më të ashpër të mundshme.
