Një legjendë është larguar përgjithmonë nga bota e të gjallëve, duke lënë pas historinë e tij të madhe. “Mësuam për vdekjen e Krujf. Fjalët nuk dalin”, është komunikata e Federatës Holandeze të Futbollit në “Twitter”, për futbollistin që bëri epokë me fanelën portokalli dhe në vitin 1974 e udhëhoqi përfaqësuesen e vendit të tij deri në finalet e Botërorit të Gjermanisë Perëndimore. Tani vetëm dhimbje, heshtje dhe kujtime. Ndërsa për klubin e Ajaksit është larguar futbollisti më i madh i të gjitha kohërave. E gjithë bota e futbollit ka ngushëlluar familjen dhe ka shpërndarë copa kujtimesh nga numri 14 më i famshëm në botë. “Do të duam gjithmonë Johan”, shkruan klubi i Barcelonës, ku Krujf luajti për pesë vjet dhe drejtoi nga pankina për tetë vite të tjera. Johan Krujf u nda nga jeta në moshën 69 vjeçare, duke u konsideruar inspirues, model, pikë referimi, filozof, mit, legjendë, gjeni. “Nuk do të harroj kurrë”, shkruan Maradona në “Facebook”.
