Trebishti një fshat në verilindje të Shqipërisë duket një fshat fantazmë, i boshatisur nga banorët e tij, të cilët nxitojnë për të marrë pasaportën bullgare, e cila u hap derën drejt vendeve të Bashkimit Europian.
Të paktën kështu raporton në një shkrim të saj agjencia e lajmeve franceze AFP.
Arman Kadriu ka emër shqiptar, por djali i tij 12 vjeçar e konsideron veten bullgar.
“Unë nuk dua të rri këtu dhe të kujdesem për lopët. Unë dua të bëhem futbollist”, shprehet ai i mbuluar nga djersa, teksa gjuan një top në rrugën e fshatit të Gollobord, një rrugë e mbuluar nga balta.
“Të shkosh në Angli me një pasaportë bullgare është e mundur”, shton ai teksa shqipton në gjuhën bullgare “mirupafshim”.
Shqipëria dhe Bullgaria nuk ndajnë të njëtin kufi. Shqipëria nuk është një vend anëtar i BE.
Por, në projektligjin e ri që po përgatitet në Shqipëri, bullgarët nuk llogariten si minoritet, ndryshe nga grekët, maqedonasit apo serbo-malazezët.
Origjina e sllavëve në komunitete të ndryshme në lindje të Shqipërisë ka qenë shpesh e diskutueshme. Fqinjët maqedonas pretendojnë se ato janë etnitet maqedonas.
Por sipas Agjencisë shtetërore të bullgarëve jashtë, që edhe vendos për nënshtetësinë, familjet bullgare janë vendosur në Shqipëri që në shekullin e pestë dhe pasardhësit e tyre rrjedhin nga diaspora e saj.
Ende nuk ka statistika, por organizatat bullgare në Shqipëri vlerësojnë se janë rreth 100.000 pasardhës të tyre në Shqipëri.
Duket se Parlamenti Europian e pranon dhe në shkurt kërkoi nga Tirana që “të drejtat e etnisë bullgare në zonën e Prespës, Gollobordës dhe Gorës të pasqyrohen në ligj dhe të zbatohen”.
Një rekomandim i tillë ka ngjallur shpresat.
“Çdo ditë rreth 7 apo 8 persona interesohen të marrin nënshtetësinë bullgare”, shprehet për AFP Haxhi Pirushi, i cili është kryetar i shoqatës “Golloborda e Artë” që jep çertifikata për shqiptarët me origjinë bullgare, çertifikata që njihen edhe nga qeveria në Sofie të Bullgarisë e mbyll shkrimin AFP.
