Rritet niveli i korrupsionit, është mbi mesataren e rajonit
“Shqipëria, Vendet në Tranzicion 2016” është raporti i Freedom House që bën një klasifikim të 7 treguesve mbi të cilët del niveli i demokracisë së një vendi. Sipas këtij raporti 5 nga 7 treguesit janë në përkeqësim, 1 është vendnumëro dhe 1 ka përmirësim, krahasuar me vitin 2007. Ndërsa në krahasim me vitin 2015, treguesit përgjithësisht nuk ndryshojnë, përvec përkeqësimit të pavarësisë së medias. Kështu Shqipëria rezulton me një pikësim prej 4.14 për progresin demokratik në vitin 2016, duke mos shënuar ndryshim në raport me vitin e mëparshëm dhe duke qenë më ulët se në periudhën 2007-2011, kur ky tregues ishte poshtë nivelit 4. Renditja bazohet në një shkallë nga 1 në 7, ku 1 përfaqëson nivelin më të lartë të progresit demokratik dhe 7 më të ulëtin. Për Shqipërinë raporti është përgatitur nga Besfort Lamallari. Në krahasim me vendet e tjera, Shqipëria pozicionohet më mirë se Kosova (5.07), Maqedonia (4.29) dhe Bosnja (4.5) dhe më dobët se Mali i Zi (3.93), Serbia (3.75), Bullgaria (3.25) dhe Rumania (3.46).
Korrupsioni vijon të mbetet i lartë në nivelin e 5.25 (për periudhën 2013-2016) dhe më i madh se periudha 2007-2012, kur kishte pikësimin 5. Ky tregues është gjithashtu më i lartë se mesatarja e rajonit, prej 4.89 . Në rajon, korrupsioni më i ulët është në Serbi (4.25), ndërsa më i larti në Kosovë (6). Shqipëria renditet e dyta në rajon pas Kosovës për nivelin e korrupsionit.
