Fondi i Zhvillimit të Rajoneve, ca të nënës e ca të njerkës

Investimet në qarqet e vendit peng të interesave politike

Shpërndarja e fondeve buxhetore për Zhvillimin e Rajoneve në vitet 2014-2015 duket se ka patur kriter të vetëm ndarjen politike. Të paktën për njërin prej grupeve të Fondit të Zhvillimit të Rajoneve, atë të infrastrukturës vendore që është edhe përbërësi më i madh, kjo është plotësisht e qartë. Shifrat që do të paraqesim më poshtë janë marrë nga Fletorja Zyrtare nr 41, 2015. Sipas tabelave të dala nga qeveria në këtë zë në vitin 2014, që ka qenë edhe viti para zgjedhjeve vendore qeveria ka deleguar për 12 qarqet e vendit mbi 5 miliardë lekë. Një vit më vonë shifra e parave të disbursuara planifikohet të jetë vetëm 2.26 miliardë lekë, pra më pak se gjysma. Zgjedhjet tashmë kishin mbaruar. Po kaq e pakuptimtë është edhe ndarja e bërë sipas qarqeve, ku bie në sy diskriminimi për zona të caktuara të vendit. Sipas tabelës nr 1 në fletoren zyrtare, në vitin 2014 vetëm tre qarqe: Tirana, Vlora e Durrësi kanë marrë gjysmën e totalit të parave të dhëna. Pikërisht aty ku edhe betejat elektorale ishin më të fuqishmet. Gjysma tjetër ka shkuar për 9 qarqe të vendit, ndërkohë që Dibra, Kukësi dhe Shkodra kanë marrë së bashku në vitin 2014 vetëm 180 milionë lekë, ose e thënë ndryshe shumë më pak se sa ka marrë e vetme Lezha. Krahasimi me qarqet e tjera është pa vend. Një përfitues i madh i fondeve të rajoneve është edhe Qarku i Korcës, i cili në 2 vitet 2014-2015 ka marrë 1 miliard lekë nga 7.2 të shpërndara gjithsej. Në qarqe të caktuara si ai i Vlorës për shembull, niveli i lartë i investimeve nëpërmjet këtij fondi ka vijuar edhe në vitin paszgjedhor 2015.

Shpjegime më të hollësishme të ndarjes së fondeve të rajoneve për infrastrukturën i gjeni në tabelën e mëposhtme të ndërtuar mbi të dhënat e publikuara në Fletoren Zyrtare. Vlen të sqarohet se infrastruktura publike rajonale, edhe pse më i madhi, është vetëm njëri nga zërat e fondit të rajoneve. Drejtime të tjera ku shkojnë paratë e rajoneve janë Shëndetësia, Arsimi, Shqipëria Dixhitale etj.

TABELA

Ndarja e fondeve për Projektet e Infrastrukturës Vendore

Në million lekë