Deputetja e Partisë Demokratike, Flutura Açka, ka reaguar ashpër pas statusit të kryeministrit Edi Rama, ku zbuloi se kishte zhvilluar një bisedë me kryeministrin e Maqedonisë së Veriut, Dimitar Kovaçvski, dhe presidentin e Serbisë, Aleksandër Vuçiç, në lidhje me vendimin nëse do të marrin pjesë apo jo në Samitin e 23 Qershorit BE-Ballkani Perëndimor, në Bruksel.
Përmes një postimi në “Facebook”, deputetja Açka ka “shpërthyer” ndaj kryeministrit dhe ka kërkuar dorëheqjen e tij.
“Nëse nuk do të shkosh në Bruksel – fundja ç’e do ti Brukselin kur ke Surrelin! – jep dorëheqjen! Kështu bëjnë shtetarët evropianë kur dalin mbi dëshirat e popujve të tyre”, shkruan Açka.
Ndër të tjera deputetja demokrate shkruan se kryeministri nuk mund t’i japë të drejtë vetes të mos paraqitet në Samitin e ardhshëm të BE.
“Kush je ti që i jep të drejtë vetes të mos paraqitesh në Samitin e ardhshëm të Bashkimit Evropian në data 23-24 në Bruksel, kushtuar veçanërisht Ballkanit Perëndimor? Ti je veç një ofiqar i lartë i shqiptarëve, që je aty me vota të vjedhura, të blera, të grabitura, gjë e njohur botërisht tashmë. Kë shqiptar pyetje në duhet të shkosh në Bruksel, apo jo? Ti the se u këshillove për këtë vendim me Maqedoninë e Veriut dhe me Serbinë, dhe shpotite se nuk ia vlekërka të shkosh në Bruksel. Me Vuçiçin? Prostitutën gjatovinë të Rusisë? Me Vuçiçin ti vendos në duhet të paraqitemi ne shqiptarët në Evropë?”, shkruan Açka.
Ajo shton se “Shqipëria e lidhur me Maqedoninë e Veriut për hapjen e negociatave me Bashkimin Evropian, është vetëm një pretekst që Evropa përdor kundër regjimit të korruptuar skajshëm”.
Ndër të tjera deputetja demokrate shprehet se me propagandë dhe jo për të përmirësuar jetën e mijëra të varfërve, kryeministri prodhon piruetat e narkoshtetit.
“Nuk është fare e vështirë për Evropën ta ndajë Shqipërinë nga Maqedonia e Veriut për të nisur negociatat, por nuk e bën, sepse e di që ti do ta përdorësh vetëm për propagandë dhe jo për të përmirësuar jetën e atyre mijëra të varfërve që prodhon përditë magjeja e politikës tënde neofashiste, piruetat e narkoshtetit tënd dhe hargalisja mbi terrene të brishta gjeopolitike ku ecim në të gjithë bashkë si shqiptarë. Nëse nuk do të shkosh në Bruksel – fundja ç’e do ti Brukselin kur ke Surrelin! – jep dorëheqjen! Kështu bëjnë shtetarët evropianë kur dalin mbi dëshirat e popujve të tyre”, shkruan Açka.
