Zv/ Presidenti i S&D dhe raportuesi për Shqipërinë në Parlamentin Evropian, Knut Fleckenstein ka një mesazh të fuqishëm për politikën shqiptare, tashmë që ajo ndodhet në udhëkryq për votimin e reformës në drejtësi.
Në një intervistë ai thotë nga Brukseli, se fajtorët e mungesës së kompromisit për reformën në drejtësi, do të dalin në fund të procesit, por nga vendimet e tyre varet e ardhmja e gjithë vendit.
Fleckenstein këshillon edhe çfarë shembulli të ndjekë politika shqiptare, për të kuptuar si ata të bëhen bashkë për fitoren e Shqipërisë.
Sa larg BE-së na mban reforma e drejtësisë?
Knut Fleckenstein- Ka mbetur vetëm një pikë dhe duhet të jetë e mundur zgjidhja e këtij problemi të vetëm. Bëhet fjalë për emërimet e gjyqtarëve dhe prokurorëve. Ata as nuk duhet të jenë pjesë e klasës politike dhe as procesi nuk duhet të dominohet nga mazhoranca.
-A i keni identifikuar fajtorët e mungesës së kompromisit, apo do të ndëshkoni gjithë shqiptarët ( jo vetëm klasën politike) ?
Knut Fleckenstein- Politikanët gjithmonë trajtojnë çështje për njerëzit e vendit të tyre. Sa prej tyre janë fajtorë mund të thuhet vetëm në fund. Por, më vjen keq, nga kjo përfiton, ose vuan, i gjithë vendi.
-A e keni humbur durimin me klasën politike shqiptare? Çfarë mesazhi keni për ta?
Knut Fleckenstein- Nuk jam lodhur me ta, por do t’i këshilloja klasës politike të shoh kampionatin evropian. Lojtarët e ekipit tuaj kombëtar ndeshen zakonisht për ekipe të ndryshme kundër njëri-tjetrit. Por, tani ata luftojnë së bashku për një fitore të përbashkët. Janë të bashkuar për Shqipërinë. Do të ishte mirë të merrej ky shembull nga politika.
