Një ditë pas zjarrit që ra në spitalin modular të Tetovës ku po merrnin kujdes shëndetësore pacientë me koronavirus, qytetarët e Tetovës kanë mbetur të tronditur.
Dëshmitarët e ngjarjes thonë se ka pasur britma të shumta njerëzish ndërsa shtojnë se flakët kanë avancuar në mënyrë shumë të shpejtë.
Qytetarët shprehen për mediat lokale se në vendin e ngjarjes për rreth 10 minuta kanë qenë prezent edhe zjarrfikësit, por fatkeqësisht zjarri ka shkrumbuar godinën për shumë pak kohë.
“Jam shumë i tronditur! Nuk e di deri ku do të shkojë, ky shtet si do të funksionojë kështu. Më vjen keq për njerëzit që jetojnë këtu. Unë jam mysafir jam këtu në pushim. Më vjen keq për njerëzit që jetojnë këtu. Kjo është skandal!”, thotë një emigrant nga Tetova.
“Isha brenda në oborr. Dëgjuam disa britma njerëzish, çfarë ishte…Nuk i dhashë rëndësi, thash fëmijët janë. Kur pas 10 minutave dëgjova se është djegur spitali. Zjarr i madh. Britma të mëdha kanë qenë, tragjedi. Pas 10 minutave a kishte vetura të zjarrfikësve? Po po kishte”, thotë një tjetër qytetar i Tetovës.
“Me sy kur erdha unë vetëm flakën e pashë, tymin. Prej nga ura poshtë e pash tymin. Dmth shumë tym, shumë lartë, dmth edhe era vinte deri poshtë. 30 metra lartë zjarri. Katastrofë ka qenë, ulërime e madhe pikëllim e madhe.”
Nga zjarri i së mërkurës mbrëma humbën jetën 14 persona e 12 të tjerë mbetën të lënduar.
