Të shkosh në Vlorë dhe të gjesh njerëz kaq tolerantë, kjo mund të ndodhë vetëm në futboll. Edhe pas humbjes së rradhës me Kukësin në shtëpi, drejtuesit e Flamurtarit i kanë dhënë besim të plotë trajnerit, stafit të tij, por edhe futbollistëve, madje thuhet se në këtë takim kanë folur me superlativa për cilësinë e këtyre që përbëjnë skuadrën e tanishme. Ndërkohë që edicionit i kanë mbetur vetëm 360 minuta, ndërsa Flamurtari vazhdon të ndajë vendin e parafundit në tabelën e renditjes me pikë të barabarta me Bylisin, një skuadër kjo që nuk dorëzohet kurrë. Por ambjenti tek kuqezinjtë nuk ka qenë gjithmonë kaq tolerant. Për të ndërtuar këtë skuadër u larguan pothuajse të gjithë ata që kishin dalë nga shkolla vlonjate e futbollit, ndërsa këta që e popullojnë tani nuk duket se kanë ndonjë interes të veçantë për fanelën, por janë tërhequr nga mundësitë financiare të Sinan Idrizit dhe shoqërive që ai përfaqëson. Sokol Kushta thotë herë pas here me ironi se ka dëgjuar një kërcitje, ndoshta ngaqë këtyre u ka plasur cipa. Pra kjo nuk është një garë vlonjate dhe prandaj edhe ky Flamurtar e ka të vështirë të mundë qoftë edhe Ballshin në luftën e mbijetesës.
Ndeshjet e mbetura të Flamurtarit dhe Bylisit
Java 33
Tërbuni – Flamurtari
Bylis – Teuta
Java 34
Flamurtari – Tirana
Partizani – Bylis
Java 35
Bylis – Flamurtari
Java 36
Vllaznia – Bylis
Flamurtari – Skënderbeu
